ދައުލަތަށް އަނބުރާ ހޯދަން އެދުނު 29 މިލިއަން ރުފިޔާގެ ތެރެއިން ލިބުނީ އެންމެ 11 ހާސް ރުފިޔާ ކަމަށް އެންޓި ކޮރަޕްޝަން ކޮމިޝަން (އޭސީސީ) އިން ބުނެފި އެވެ.
އެ ކޮމިޝަނުން މިހެން ބުނީ މިއަދު ނެރުނު ރިޕޯޓެއްގަ އެވެ. އެރިޕޯޓުން ދައްކާ ގޮތުގައި މިދިޔަ އަހަރު ދައުލަތަށް ހޯދަން ޖެހޭކަމަށް ކަނޑައަޅާފައިވަނީ 29 މިލިއަން ރުފިޔާ އެވެ. އެފައިސާ އަކީ ކޮރަޕްޝަން މައްސަލަތަކުގެ ގޮތުގައި އޭސީސީއަށް ހުށަހަޅާފައިވާ މައްސަލަތަކުގެ ތެރެއިން ދައުލަތަށް އަނބުރާ ލިބެންޖެހޭކަމަށް އޭސީސީން ކަނޑައެޅި ފައިސާ އެވެ.
އޭސީސީގެ ރިޕޯޓުގައި ބުނެފައިވަނީ މިދިޔަ އަހަރު ޕްރޮސެކިއުޓާ ޖެނެރަލްއަށް ފޮނުވި މައްސަލަތަކުގެ ތެރެއިން ހަތް މައްސަލައެއްގައި ފައިސާ ހިމެނޭ ކަމަށެވެ. އެމައްސަލަތަކުގައި 197 މިލިއަން ރުފިޔާ ހިމެނޭއިރު ދައުލަތަށް އަނބުރާ ލިބެން ޖެހޭ ހަތަރު ލައްކަ ރުފިޔާ ހިމެނެ އެވެ. އޭގެ ތެރެއިން އެއްވެސް މިންވަރެއް ދައުލަތަށް ލިބިފައެއް ނުވެ އެވެ.
2019 ވަނަ އަހަރާއި އަޅާ ބަލާއިރު މިދިޔަ އަހަރު އޭސީސީއަށް ހުށަހެޅި މައްސަލަތައް ވަނީ 25 އިންސައްތަ ދަށަށް ގޮސްފަ އެވެ. ސަބަބެއް ކަމުގައި އޭސީސީން ލަފާކުރަނީ ކޮވިޑް-19 އެވެ.
މިދިޔަ އަހަރު ހުށަހެޅި މައްސަލަތަކުގެ އަދަދު މަދުނަމަވެސް 2019 ވަނަ އަހަރާ އަޅާ ބަލާއިރު މިދިޔަ އަހަރު އޭސީސީން ނިންމި މައްސަލަތައް ވަނީ 35 އިންސައްތަ އިތުރުވެފަ އެވެ.
އެގޮތުން މިދިޔަ އަހަރު އެކޮމިޝަނަށް ހުށަހެޅި 938 މައްސަލައިގެ ތެރެއިން 961 މައްސަލަ ވަނީ ބަލައި ނިންމައިފަ އެވެ. 2019 ވަނަ އަހަރު ހުށަހެޅީ 1،397 މައްސަލަ އެވެ. އޭޣެ ތެރެއިން 710 މައްސަލަ ވަނީ ބަލައި ނިންމައިފަ އެވެ.
