މި ފެށޭ ނޮވެމްބަރު މަހުން ފެށިގެން ކުރު މުއްދަތަށް ރާއްޖެއިން ތައިލެންޑަށް ދަތުރުކުރެވޭ "ސޭންޑް ބޮކްސް" އުސޫލު އާއްމުކޮށްފިއެވެ.
ތައިލެންޑްގައި ހުންނަ ދިވެހިރާއްޖޭގެ އެމްބަސީން ބުނެފައިވަނީ، ކޮވިޑް19 އާއި ގުޅިގެން ތައިލެންޑަށް އެތެރެވުމަށް ތައި ސަރުކާރުން އަޅާފައިވާ ފިޔަވަޅުތަކަށް 1 ނޮވެމްބަރުން ފެށިގެން ލުއިތަކެއް ދިނުމަށް ތައި ސަރުކާރުން ނިންމާފައިވާ ކަމަށެވެ. އެގޮތުން ނޮވެމްބަރު އެކަކުން ފެށިގެން ސޭންޑް ބޮކްސް ސްކީމްގެ ދަށުން ދިވެހިރާއްޖެއިން ތައިލެންޑަށް ކުރު މުއްދަތަށް ދަތުރުކުރުމަށް ކަނޑައަޅާފައިވާ އުސޫލު ވަނީ އާއްމުކޮށްފައެވެ.
މި ސްކީމްގެ ދަށުން ތައިލެންޑަށް އެތެރެވެވެނީ ވައިގެމަގުން ދަތުރުކުރާ ފަރާތްތަކަށެވެ. އެގޮތުން ބެންކޮކް ސުވަރުނަބޫމް އެއަރޕޯޓް، ޑޮންމުއާން އެއަރޕޯރޓް، މެދުވެރިކޮށް ތައިލެންޑަށް އެތެރެވެވޭނެ ކަމަށް އެމްބަސީގެ ލިޔުމުގައިވެއެވެ.
ސޭންން ބޮކްސް ސްކީމްގެ ޝަރުތު ތަކުގެ ތެރޭގައި ކޮވިޑް19 ވެކްސިން ފުރިހަމަކުރީތާ 14 ދުވަސް ވެފައިވާ ފަރާތެއް ކަމަށް ވުމާއެކު 12 އަހަރުން ދަށުގެ ވެކްސިން ނުޖަހާ ކުޑަކުދިންނަށް ވެކްސިން ޖަހާފައިވާ ބެލެނިވެރިންނާއެކު ދަތުރު ކުރެވެއެވެ. ތައި ސަރުކާރުން ކަނޑައަޅާފައިވާ ހެލްތް ސެޓިފައިޑް ހޮޓެލް އެއްގައި 7 ރޭގެ ރިޒަވޭޝަނެއް ހަދާފައި އޮންނަންޖެހެއެވެ.
ދަތުރު ކުރަނީ 7 ދުވަހަށްވުރެ ކުރު މުއްދަތަކަށް ނަމަ އެ މުއްދަތުގެ ނިޔަލަށް ހޮޓެލް ރިޒަވޭޝަން ހަދާފައިވާ ކަމުގެ ލިޔުމަކާއި ކޮމްފާމްޑް ރިޓާން ޓެކްޓް ހުށަހަޅަން ޖެހެއެވެ. މަދުވެގެން ފަންސާސްހާސް ޔޫއެސް ޑޮލަރުގެ ކޮވިޑް19 މެޑިކަލް ހަރަދު ކަވަރުކުރާ އިންޝުއަރެންސެއް ނަގާފައި އޮންނަންޖެހޭ ކަމަށްވެސް ވަނީ ބުނެފައެވެ. ތައިލެންޑަށް ދަތުރު ކުރުމުގެ ކުރިން 72 ގަޑިއިރު ހަމަނުވާ ޕީސީއާރު ނެގެޓިވް ނަތީޖާއެއް އޮންނަޖެހެއެވެ.
މި އުސޫލުގެ ދަށުން ދަތުރުކުރާ ފަރާތްތައް ކަރަންޓީނުވާކަށް ނުޖެހެއެވެ. އޮން އެރައިވަލްގެ ޕީސީއާރު ނަތީޖާ ނެގެޓިވް ނަމަ ހޮޓެލުން ބޭރަށް އާއްމު ތަންތަނަށް ގޮސް އުޅެވޭ ކަމަށްވެސް ބުނެފައިވެއެވެ.
