އަރިދަފުސް ރޯގާ އިތުރުވާތީ ސަމާލުވާން އެދިއްޖެ

އަރިދަފުސް ރޯގާ ޖެހިގެން ރިޕޯޓްކުރެވިފައިވާ ވަރު އިތުރުވެފައިވާތީ ސަމާލުވުމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން އެދިއްޖެ އެވެ.

އެޗްޕީއޭއިން ވަނީ އަރިދަފުސް ރޯގާ ރިޕޯޓް ކުރެވިފައިވާ މިންވަރު އިތުރު ވެފައިވާތީ ގިނަގިނައިން ސައިބޯނި ލައިގެން އަތް ދޮވުން އިތުރު ކުރަން އިލްތިމާސްކޮށްފަ އެވެ.

އަރިދަފުސް ރޯގާ އަދި ނޭވާލާ ނިޒާމަށް ޖެހޭ ބަލިތަކުން ރައްކާތެރިވުމަށް ކުރެވިދާނެ ކަންތަށްތައް:

• ގިނަ ގިނައިން މީހުން އެއްވެ އުޅޭ ތަންތަނަށް، ކުޑަކުދިންނާއި ނޭވާލާ ނިޒާމުގެ ބަލިތައް ހުންނަ މީހުންނާއި އުމުރުން ދުވަސްވީ މީހުން ނުދިއުން
• ބަލިމީހުންނަށް ޒިޔާރަތްކުރާއިރު ކުޑަކުދިން ނުގެންދިއުން
• ހުން އައިސް ރޯގާގެ އަލާމާތްތައް ހުންނަނަމަ ސްކޫލަށް ނުފޮނުވުން
• އަރިދަފުސް ރޯގާ ހުރިނަމަ އަދި ކެއްސާ ކިނބިހި އަޅާއިރު، ނޭފަރާއި އަނގަ ރަނގަޅަށް ނިވާވާހެން މާސްކް އެޅުން
• އަތް ދޮންނަން ޖެހޭ ހާލަތްތަކުގައި، ސައިބޯނި ލައިގެން ރަނގަޅަށް އަތް ދޮވުން ނުވަތަ ސެނިޓައިޒަރ ބޭނުން ކޮށްގެން އަތް ސާފުކުރުން ހިމެނެ އެވެ.

އަރިދަފުސް ރޯގާ ޖެހިގެން ރިޕޯޓްކުރެވޭ މިންވަރު އިތުރުވެފައިވާ ކަމަށް އެޗްޕީއޭއިން ބުނެފައިވީނަމަވެސް، މިކަމުގެ އިތުރު ތަފްސީލެއް އަދި ތަފާސްހިސާބެއް މިހާތަނަށް ހާމަކޮށްފައެއް ނުވެ އެވެ.