މި ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން ގޯތިގެދޮރު ޕްރޮގްރާމްގެ ދަށުން މާލޭގައި ދިރިއުޅޭ މީހުންނަށް ބިން ދޫކުރުމުގެ އުސޫލު ހައުސިން މިނިސްޓްރީން މިއަދު އާންމުކޮށްފި އެވެ.
މި އުސޫލަކީ 18 އަހަރުން މަތީގެ ދިވެހި ރައްޔިތުންގެ ތެރެއިން ޝަރުތު ހަމަވާ ފަރާތްތަކަށް މާލެ ސަރަހައްދުންނާއި ރަސްމާލެއިން ބަންޑާރަ ގޯތި ދޫކުރުމަށް އެކުލަވާލާފައިވާ އުސޫލެކެވެ.
ހައުސިން މިނިސްޓްރީން ބުނި ގޮތުގައި ގޯތި ގެދޮރު ޕްރޮގްރާމްގެ ދަށުން ދެ ކެޓަގަރީއަކުން ރަސްމާލެއިން ގޯތި ދޫކުރާނެއެވެ. އެގޮތުން ދޫކުރާ ކޮންމެ ގޯއްޗެއްގެ ބޮޑުމިނަކީ 1,250 އަކަފޫޓެވެ.
ކެޓަގަރީ 1 ގައި ހިމެނެނީ މާލޭގެ ރަށްވެއްސަކަށް ވެފައިވާތާ މަދުވެގެން އެއް އަހަރުވެފައިވާ ފަރާތްތަކެވެ. އޭގެ ތެރޭގައި އުފަންވީއްސުރެ މާލޭގެ ރަށްވެހިންގެ ގޮތުގައި ތިބި މީހުންނާއި، ދަފްތަރުގައި ރަޖިސްޓްރީވެފައިވާ ފަރާތްތައް ވެސް ހިމެނެ އެވެ.
ކެޓަގަރީ 2 ގެ ދަށުން ގޯތި ދޫކުރުމަށް ހަމަޖެހިފައި ވަނީ މާލޭގައި ދިރިއުޅޭ އެހެން ރަށްރަށުގެ ރަށްވެހިންގެ ތެރެއިން، މެދުނުކެނޑި މާލޭގައި ދިރިއުޅޭތާ 15 އަހަރުވެފައިވާ ފަރާތްތަކަށެވެ. މި މުއްދަތު ގުނާނީ އުސޫލަށް އަމަލުކުރަން ފަށާ ދުވަހާ ހަމައަށް މެދުނުކެނޑި މާލޭގައި އުޅެފައިވާ މުއްދަތަށް ބަލައިގެންނެވެ.
ސަރުކާރުން ހުޅުވާލާފައިވާ އެންމެންނަށް ބޯހިޔާވަހިކަމުގެ ސްކީމަށް މިހާތަނަށް ގިނަ އަދަދެއްގެ ފަރާތްތަކުން ކުރިމަތިލާފައިވާއިރު އިމާރާތްކުރުމާއި ގެދޮރުވެރިކަމާ ބިނާރާ ބެހޭ ވަޒީރު ޑރ. ޢަބްދުﷲ މުއްޠަލިބް ވިދާޅުވީ މި ސްކީމަށް މިހާތަނަށް ކުރިމަތިލާން ހުށަހަޅާފައިވާ އަދަދުތަކަށް ބަލާއިރު އެކި ހުށަހެޅުމުގެ އެކި މަރުހަލާތަކުގައިއާއި މިހާތަނަށް ހުށަހަޅާފައިވާ ފޯމުތައް ހިމެނޭޙެން ޖުމްލަ 18،399 އެޕްލިކޭޝަނެއް އޮތް ކަމަށެވެ.
