ކުރިއަށް އޮތް ރައްޔިތުންގެ މަޖިލީހުގެ އިންތިހާބުގައި ރާއްޖޭން ބޭރުގައި ވޯޓުލުމަށް ބޭނުންވާ އަދަދަށް މީހުން ރީ-ރަޖިސްޓްރީ ކޮށްފައިވަނީ ސްރީލަންކާ އާއި މެލޭޝިއާގައި ކަމަށް އިލެކްޝަންސް ކޮމިޝަން (އީސީ) ބުނެފި އެވެ.
މަޖިލިސް އިންތިހާބުގައި ބޭރުގެ ހަ ގައުމެއްގައި ވޯޓު ފޮށި ބަހައްޓަން އީސީއިން ނިންމި އެވެ. އެއީ ސްރީލަންކާ، މެލޭޝިއާގެ އިތުރުން އިންޑިއާ އާއި ތައިލެންޑް އާއި އިނގިރޭސިވިލާތް އަދި ޔުނައިޓެޑް އަރަބް އެމިރޭޓްސް އެވެ. ނަމަވެސް ރީ-ރަޖިސްޓްރޭޝަނަށް ހުޅުވާލި ފުރުސަތު އިއްޔެ ހަވީރު 4:00 އަށް ހަމަވި އިރު ވޯޓުފޮށި ބެހެއްޓޭވަރަށް ރީ-ރަޖިސްޓްރީކޮށްފައިވަނީ ސްރީލަންކާ އާއި މެލޭޝިއާގަ އެވެ.
ރީ-ރަޖިސްޓްރޭޝަނަށް ދިން މުއްދަތުގެ ތެރޭގައި ރީ-ރަޖިސްޓަރީ ކުރުމަށް ޖުމްލަ 13،378 މީހުން ހުށަހަޅާފައިވާ ކަމަށާއި އޭގެ ތެރެއިން 11،919 މީހުން ރީ-ރަޖިސްޓަރީ ކޮށްދީފައިވާއިރު 1،459 ހުށަހެޅުން ބަލައިނުގަނެވޭ ކަމަށް އީސީއިން ބުނެ އެވެ.
މަޖިލިސް އިންތިހާބު ރޯދައިގެ ފަހުން ބާއްވަން އިންތިހާބުތަކާބެހޭ އާންމު ގާނޫނަށް ހުށަހަޅާފައިވާ އިސްލާހު މަޖިލީހުގެ ކޮމިޓިން ފާސްކޮށްފައިވާއިރު ރޯދައިގެ ފަހުން އިންތިހާބު ބާއްވަން ޖެހިއްޖެ ނަމަ ރީ-ރަޖިސްޓްރީކުރަން އިތުރު ފުރުސަތެއް ދޭނެ ކަމަށް އީސީއިން ވަނީ ބުނެފަ އެވެ.
