މޯލްޑިވްސް މީޑިއާ އެންޑް ބްރޯޑްކާސްޓިންގ ރެގިއުލޭޝަންގެ ބިލު އަނބުރާ ގެންދިއުމުގެ ވިސްނުމެއް ނެތްކަމަށް ބަންޑާރަނައިބު އަހުމަދު އުޝާމް ވިދާޅުވެއްޖެއެވެ.
ރައީސް އޮފީހުގައި ނޫސްވެރިންނާއެކު ބޭއްވި ބައްދަލުވުމެއްގައި އުޝާމް ވިދާޅުވި ގޮތުގައި، މި ބިލާ ގުޅޭ މަސައްކަތްތަކެއް ކުރީގެ ރައްޔިތުންގެ މަޖިލީހުންވެސް ކޮށްފައިވެއެވެ. ”އޭރު މަޖިލީހުގެ މެންބަރެއްގެ މަގާމުގައި ހުރިއިރު، މިނިވަން މުއައްސަސާތަކާ ބެހޭ ކޮމިޓީގައިވެސް މި މަސައްކަތްތައް ކުރިއަށް ދިޔަ،“ އެމަނިކުފާނު ވިދާޅުވިއެވެ.
އުޝާމް ވިދާޅުވި ގޮތުގައި، ކަމާ ގުޅުންހުރި އިދާރާތަކުގެ މަޝްވަރާއަށްފަހު، ބަންޑާރަ ނައިބުގެ އޮފީހުން މިފަދަ ބިލެއްގެ މަސައްކަތް ފަށައި، ގިނަ މަސައްކަތްތަކެއް ކުރެވިފައިވާ ކަމަށެވެ. މީގެ ކުރިން ހުށަހެޅި ބިލް އަނބުރާ ގެންދިއުމާއި އެކު ބިލާ ގުޅޭ މަޝްވަރާތަކާއި ދިރާސާތަކެއް ބަންޑާރަނައިބްގެ އޮފީހުން ހަދަން ފަށާފައިވާ ކަމަށް އެމަނިކުފާނު ފާހަގަކުރެއްވިއެވެ.
މިހާރު މި ހުށަހަޅާފައި އޮތް ބިލު ހުށަހެޅިފައިވަނީ އެ މަސައްކަތް ނުނިމެނީސް ކަން ބަންޑާރަނައިބު ފާހަގަކުރެއްވިއެވެ. ނަމަވެސް، ބިލު އަނބުރާ ގެންދިއުމުގެ ބަދަލުގައި މަސައްކަތް ކުރިއަށް ގެންދާނީ އިތުރަށް ދިރާސާކޮށް، އިސްލާހުކުރުމުގެ މަސައްކަތްތައް ކުރުމަށްކަން އެމަނިކުފާނު ތަކުރާރުކޮށް ވިދާޅުވިއެވެ.
އުޝާމް ވިދާޅުވީ މިހާރު ހުށައަޅާފައިވާ ބިލު ދިރާސާކޮށްގެން ނޫސްވެރިންގެ ކަންބޮޑުވުންތަކަށް ޙައްލު ގެނެވިދާނެކަމަށާއި ނަމަވެސް ބިލު އަނބުރާ ގެންދަންޖެހޭކަމަށް ޤަބޫލެއް ނުކުރައްވާކަމަށެވެ.
