ޖަޕާނުގެ ހިއުމަން ރިސޯސް ޑިވެލޮޕްމެންޓް ސްކޮލާޝިޕް (ޖޭޑީއެސް)އަށް ކުރިމަތިލުމަށް ދިވެހީންނަށް ފުރުސަތު ހުޅުވާލައިފިއެވެ.
ޖަޕާނުގައި 2020 ވަނަ އަހަރު ރާއްޖޭގައި އިފުތިތާހުކުރި ޖޭޑީއެސް ސްކޮލާޝިޕްގެ މަގުސަދަކީ އެ ގައުމުން އެހީ ދޭ ގައުމުތަކުގައި، ހިއުމަން ރިސޯސް ދާއިރާއިން މީހުން ތަމްރީނު ކުރުމުގައި އެހީތެރިވުމެވެ. އެއީ، ޖަޕާން ސަރުކާރުން ހުރިހާ ޚަރަދެއް ކުރާ ސްކޮލާޝިޕްތަކެކެވެ.
ޖޭޑީއެސް ސްކޮލާޝިޕް މިހާތަނަށް 27 ދިވެހީންނަށް ދީފައިވެއެވެ.
އެ ސްކޮލާޝިޕްގެ ދަށުން ދެ އަހަރު ދުވަހުގެ މާސްޓާސް ޑިގްރީ ޕްރޮގްރާމެއް ފުރިހަމަ ކުރުމަށް މިހާރު ވަނީ ފުރުސަތު ހުޅުވާލައިފައެވެ. އެގޮތުން 2026-2027ގައި ފެށޭ ދިރާސީ އަހަރަށް ހަ ސްކޮލާޝިޕް ފުރުސަތެއް ވަނީ އިއުލާންކޮށްފައެވެ.
ޖޭޑީއެސްގެ ދަށުން މާސްޓާސް ޑިގްރީ ހާސިލުކުރަން ހުޅުވާލައިފައިވަނީ:
- މާސްޓާ އޮފް އާޓްސްއިން އިކޮނޮމިކްސް / އިންޓަނޭޝަނަލް ޑިވެލޮޕްމެންޓް
- މާސްޓާ އޮފް އާޓްސްއިން އިންޓަނޭޝަނަލް ރިލޭޝަންސް
- މާސްޓާ އޮފް ސައިންސްއިން އިންޓަނޭޝަނަލް ކޯޕަރޭޝަން ޕޮލިސީ
ސްކޮލާޝިޕްތަކަށް އެޕްލައި ކުރުމާ ގުޅޭ މައުލޫމާތު ޖޭޑީއެސް ވެބްސައިޓުން ލިބެން ހުންނާނެއެވެ. އަދި ސްކޮލާޝިޕްތަކާ ގުޅޭ ގޮތުން މައުލޫމާތު ދިނުމަށް ސެޝަންތަކެއް ވެސް ބާއްވާނެއެވެ.
އެ ސްކޮލާޝިޕްގެ ދަށުން ހިންގާ ޕްރޮގްރާމްތައް ކުރިއަށްގެންދާނީ އިނގިރޭސިބަހުންނެވެ.
އެ ސްކޮލާޝިޕަށް ކުރިމަތިލާ މީހުންގެ ހުންނަން ޖެހޭ ޝަރުތުތަކުގެ ތެރޭގައި ދިވެއްސަކަށް ވުމާއި، އަންނަ އަހަރުގެ އޭޕްރިލް މަހަށް އުމުރުން 22 އަހަރު ފުރި، 39 އަހަރަށް ވުރެ ހަގު މީހަކަށް ވުން ހިމެނެއެވެ.
މީގެ އިތުރުން ތައުލީމީ ގޮތުން ބަލާއިރު، ރާއްޖެއާއި އެހެން ގައުމުތަކާއި މޯލްޑިވްސް ކޮލިފިކޭޝަން އޮތޯރިޓީ (އެމްކިއުއޭ)އިން ބަލައިގަންނަ ޔުނިވާސިޓީއަކުން ހާސިލުކޮށްފައިވާ ބެޗްލާސް ޑިގްރީއެއް އޮންނަންވާނެއެވެ.
މި ސްކޮލާޝިޕް ދިނުމުގެ ބަލާނެ ވަޒީފާގެ ދާއިރާތަކުގެ ތެރޭގައި ސިވިލް ސާވިސްއާއި މިނިވަން މުއައްސަސާތަކާއި ކޯޓުތަކާއި ގާނޫނީ ދާއިރާ ހިމެނެއެވެ. އެގޮތުން އެ ދާއިރާތަކުން މަދުވެގެން ދެ އަހަރުގެ ތަޖުރިބާ ލިބިފައިވޭތޯ ބަލާނެއެވެ.
އެ ފުރުސަތުތަކަށް ހުޅުވާލައިފައިވަނީ އަންނަ މަހުގެ 10 ވަނަ ދުވަހުގެ ނިޔަލަށެވެ.
