ދިއްދޫގައި ބިނާކުރެވުނު އިސްލާމީ މަރުކަޒުގެ މިސްކިތަށް އެ ރަށު ޗާނދަނީގޭއާގޭ ޝަހީދު ޢުމަރު އަޙުމަދުގެ ނަމުން ނަން ދީފިއެވެ.
1988 ވަނަ އަހަރު ނޮވެންބަރު ތިނެއްގެ ޢުދުވާނީ ޙަމަލާގައި ޢުމަރު އަޙުމަދު ޝާހީދުވީ އިރު ވަޒީފާ އަދާކުރައްވަމުން ގެންދެވީ މާލޭގައި، އިސްލާމީ މަރުކަޒުގެ މުވައްޒަފެއްގެ ގޮތުން، އެ މަރުކަޒަށް ޚިދުމަތްކުރެއްވުމުގައެވެ. އެ ޚިދުމަތުގައި ޢުމަރު އަޙުމަދު އުޅުއްވަނިކޮށް އޭނާ ޝަހީދުކޮށްލީ އޭނާގެ ހަތަރު ފިރިހެން ބޭފުޅުންނާއި ތިން އަންހެން ބޭފުޅުން، ޖުމުލަ ހަތް ބޭފުޅުން، ޔަތީމުކޮށްލައިފައެވެ. އޭނާގެ ލޮބުވެތި އަނބިކަނބަލުން މަރިޔަމް ޙަސަން ހުވަފަތްކޮށްލައިފައެވެ.
ޢުމުރުފުޅުން 45 އަހަރުގައި ޢުމަރު އަޙުމަދު ޝަހީދުވީ އާމްދަނީ ހޯދުމަށް ޓަކައި މާލޭގައި ވަޒީފާ އަދާކުރައްވަމުން ގެންދަވަނިކޮށެވެ. ޗުއްޓީގެ ކަންތައް ހުރި ގޮތުން ރަށަށް ވަޑައިނުގެންނެވޭތާ އޭރު ދޮޅު އަހަރެއްހައި ދުވަސް ވެދާނެއެވެ. އެހެންކަމުން، ޗުއްޓީއެއް ނަންގަވައިގެން އަނބިކަނބަލުންނާއި އުފަން ބޭފުޅުންގެ އަރިހަށް ވަޑައިގަތުމަށް ޓަކައި ޢުމަރު އަޙުމަދު ގެންދެވީ ދަތުރުފުޅަށް ހައްދަވަމުންނެވެ. ނަމަވެސް އޭނާ ތަދުބީރުކުރެއްވި މަގުސަދު ޙާޞިލުވެވަޑައިނުގެން، ތަޤުދީރުގައިވާ ގޮތަށް ފުރާނަފުޅު ޤުރުބާންކުރައްވާން ޖެހިވަޑައިގަތީއެވެ.
އިސްލާމީ ކަންތައްތަކާ ބެހޭ ވުޒާރާއިން ބުނީ އިސްލާމީ މަރުކަޒެއްގައި ޚިދުމަތްކުރައްވަނިކޮށް ޝަހީދުވި ޢުމަރު އަޙުމަދުގެ ނަންފުޅަށް، ދިއްދޫ އިސްލާމީ މަރުކަޒުގެ މިސްކިތަށް ނަން ދެއްވީ ޝަހީދު ޢުމަރު އަޙުމަދުގެ ޒިކުރާ ދިރުއްވައި އާލާކުރެއްވުމަށްޓަކައި ކަމަށެވެ. އެ ކަމަށް ޓަކައި އެންމެ ރަނގަޅު ގޮތަކީ މި އިސްލާމީ މަރުކަޒުގެ މިސްކިތުގެ ނަމާއި ޢުމަރު އަޙުމަދުގެ ނަން ގުޅުވައިލައްވައިގެންކަމަށްވާތީ އެ ގޮތަށް ނިންމެވީ ކަމަށް އެ ވުޒާރާއިން ބުންޏެވެ.
ދިއްދޫ އިސްލާމީ މަރުކަޒު ހުޅުވައިދެއްވީ އިއްޔެ ބޭއްވުނު ޚާއްސަ ރަސްމިއްޔާތެއްގައި އިސްލާމީކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދުއެވެ.
ދިއްދޫ އިސްލާމީ މަރުކަޒަކީ ގިނަ ވަސީލަތްތަކަކާއެކު ތަރައްޤީ ކުރެވިފައިވާ އިސްލާމީ މަރުކަޒެކެވެ. އެގޮތުން މި އިސްލާމީ މަރުކަޒުގައި ނަމާދު ކުރާ ބައިގެ އިތުރުން އިސްލާމީ ކުތުބުޚާނާއާއި، ކީރިތި ޤުރުއާނާއި ބެހޭ ޤައުމީ މަރުކަޒުގެ އައުޓްރީޗް ސެންޓަރަކާއި މަލްޓިޕާޕޮސް ހޯލަކާއި، 1 ސެމިނަރ ރޫމް އަދި އިދާރީ އޮފީސް ބައެއް ހިމެނެއެވެ.
ދިއްދޫ އިސްލާމީ މަރުކަޒު ހުޅުވާފައިވަނީ ހުރިހާ ވަސީލަތެއް ޤާއިމްކޮށް ފުރިހަމަ ކުރުމަށްފަހުގައެވެ. އިސްލާމީ މަރުކަޒުގެ ބޭނުން ކުރާ ފަރާތްތަކަށް ލުއިފަސޭހަކޮށްދިނުމަށް ލިފްޓުވެސް ހަރުކުރެވިފައިވާކަން ފާހަގަކޮށްލެވެއެވެ.
