މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން މާލީ ދާއިރާ ކުރިއެރުވުމަށާއި މަނިޓަރީ ގަވާނަންސް ހަރުދަނާކުރުމަށް އިންޓަނޭޝަނަލް އިސްލާމިކް ޔުނިވާސިޓީ އޮފް މެލޭޝިއާ (އައިއައިޔޫއެމް) އަދި މޯލްޑިވްސް ނޭޝަނަލް ޔުނިވާސިޓީ (އެމްއެންޔޫ) އާއެކު މުހިންމު އެމްއޯޔޫއެއްގައި ސޮއިކޮށްފި އެވެ.
އެމްއެމްއޭގައި މިއަދު ބޭއްވި ރަސްމިއްޔާތެއްގައި އެމްއެމްއޭގެ ފަރާތުން ސޮއިކުރެއްވީ ގަވަރުނަރު އަޙްމަދު މުނައްވަރެވެ. އިންޓަނޭޝަނަލް އިސްލާމިކް ޔުނިވާސިޓީ އޮފް މެލޭޝިއާ (އައިއައިޔޫއެމް)ގެ ފާރާތުން ސޮއިކުރެއްވީ އެ ޔުނިވާސިޓީގެ ރެކްޓަރު ޕްރޮފެސާ އެމެރިޓަސް ދަތުކް ޑރ. އޮސްމާން ބަކާ އެވެ.
އެމްއެންޔޫގެ ފަރާތުން ސޮއިކުރެއްވީ ވައިސް ޗާންސެލަރު އާއިޝަތު ޝެހެނާޒް އާދަމެވެ.
މި އެއްބަސްވުންތަކުގެ ސަބަބުން މާލީ ދާއިރާގައި ހަރަކާތްތެރިވާ މުއައްސަސާތަކުގެ ގާބިލުކަން އިތުރުކުރުމަށާއި އިންސާނީ ވަސީލަތްތައް ތަރައްގީކުރުމަށް ފުރިހަމަ އޮނިގަނޑެއް ގާއިމުކުރުމުގެ މަސައްކަތް ފަށާނެއެވެ. މި އެމްއޯޔޫގެ ދަށުން، މި ދެ މުއައްސަސާއާއި ވަކިވަކިން ސޮއި ކުރެވުނީ ތަމްރީނު ޕްރޮގްރާމްތަކާއި އިންޓަންޝިޕް ފުރުސަތުތަކަށް އެއްބާރުލުން ދޭނެ އެވެ. މި މަސައްކަތްތަކުން މަރުކަޒީ ބޭންކުގެ މުވައްޒަފުންނާއި މާލީ ދާއިރާގެ ޕްރޮފެޝަނަލުންނަށް މަނިޓަރީ ސިޔާސަތު ތަންފީޒުކުރުމާއި، މާލީ ނިޒާމުތައް ދިރާސާކުރުމާއި، ޝަރީޢާއާ އެއްގޮތްވާ ގޮތުގެ މަތިން ރެގިއުލޭޓްކުރުމުގެ ހުނަރުތައް ތަރައްގީކުރުމަށް އިސްކަންދޭނެ އެވެ.
މި އެމްއޯޔޫގެ ދަށުން، އިސްލާމީ ބޭންކިން އަދި ފައިނޭންސްގެ ދާއިރާއިން އައިއައިޔޫއެމްގެ ބައިނަލްއަގުވާމީ ގޮތުން ފާހަގަކުރެވޭ ތަޖުރިބާ ބޭނުންކޮށްގެން، ޝަރީޢާއާ އެއްގޮތްވާ ގޮތުގެ މަތިން ރެގިއުލޭޓްކުރުމުގެ އޮނިގަނޑުތައް ހަރުދަނާކުރުމަށާއި އައު އިސްލާމީ މާލީ އިންސްޓްރުމެންޓުތައް ތަރައްޤީކުރުމަށް އެމްއެމްއޭއަށް އެހީތެރިވެދޭނެ އެވެ.
މި އެއްބަސްވުމުގައި މަނިޓަރީ ސިޔާސަތު، މާލީ ހަރުދަނާކަން، އަދި ފިންޓެކް ކުރިއެރުންތަކާ ގުޅޭ ގޮތުން އެމްއޯޔޫގެ ބައިވެރިން އެކުގައި ދިރާސާކުރުމަށްވެސް އިސްކަންދެއެވެ. އެކަޑަމިކް އަދި ރެގިއުލޭޓަރީ ތަޖުރިބާ ހިއްސާކުރުމުގެ ތެރެއިން، މި ޕާޓްނަރޝިޕުން މަނިޓަރީ ގަވަނަންސް އަދި މާލީ ނިޒާމުގެ ދެމެހެއްޓެނިވިކަން އިތުރުކުރުމަށް މާލީ ހެކިތަކުގެ މައްޗަށް ބިނާކޮށް ސިޔާސަތުތަކަށް ހުށަހެޅުންތައް ހުށަހެޅުމަށް މަސައްކަތްކުރާނެ އެވެ.
މި އެމްއޯޔޫގެ ސަބަބުން ދިވެހިރާއްޖޭގެ މާލީ މުއައްސަސާތަކުގެ ބިންގާ ވަރުގަދަވެ، މާލީ ދާއިރާގެ ތަޖުރިބާ އިތުރުވެ، ދެމެހެއްޓެނިވި އިޤްތިސާދީ ކުރިއެރުމަށް މަގުފަހިވެގެންދާނެކަމަށް ބެލެވެއެވެ.
މި އެއްބަސްވުމުގެ ސަބަބުން:
– އިސްލާމީ މާލީ ދާއިރާގައި ޚާއްސަ ތަމްރީނު ލިބިފައިވާ ޕްރޮފެޝަނަލުންގެ އަދަދު އިތުރުވުން.
– ރާއްޖޭގެ މާލީ ރެގިއުލޭޓަރީ އޮނިގަނޑު ހަރުދަނާވެ، ބައިނަލްއަގުވާމީ މިންގަނޑުތަކާ އެއްހަމަވުން.
– އިސްލާމީ މާލީ އުފެއްދުންތަކާއި ހިދުމަތްތައް އިތުރުވެ، ރާއްޖޭގެ މާލީ ބާޒާރު ފުޅާވުން.
– މަނިޓަރީ ސިޔާސަތު އެކުލަވާލުމާއި ތަންފީޒުކުރުމުގައި ދިރާސާތަކުގެ މައްޗަށް ބިނާކޮށް ނިންމުންތައް ނިންމުން އިތުރުވުން.
– ރާއްޖޭގެ މާލީ ދާއިރާގެ ދެމެހެއްޓެނިވިކަމާއި ހަރުދަނާކަން އިތުރުވުން.
– އިސްލާމީ މާލީ ދާއިރާއާ ގުޅޭ ދިރާސާތަކާއި އެކަޑަމިކް މަސައްކަތްތައް އިތުރުވުން.
– ސަރަހައްދީ އަދި ބައިނަލްއަގުވާމީ މާލީ މުއައްސަސާތަކާއެކު ރާއްޖޭގެ ގުޅުން ބަދަހިވުން.
– ރާއްޖޭގެ މާލީ ދާއިރާގައި އިންވެސްޓްކުރުމުގެ ފުރުސަތުތައް އިތުރުވުން.
– މާލީ ދާއިރާގެ އައު ޓެކްނޮލޮޖީތަކާއި އިންވެސްޓްމަންޓް ވަސީލަތްތައް ތައާރަފުވުން.
– ރާއްޖޭގެ އިގުތިސޯދީ ކުރިއެރުމަށް މަގުފަހިވެ، ވަޒީފާގެ ފުރުސަތުތައް އިތުރުވުން.
މި އެމްއޯޔޫގެ ދަށުން ކުރެވޭ މަސައްކަތްތަކުގެ ކުރިއެރުން ވަޒަންކުރުމަށް މުއްދަތުތަކެއް ކަނޑައެޅި ޤަވާއިދުން މުރާޖަޢާކުރެވޭނެ އެވެ. އަދި މި އެއްބާރުލުމުގެ ނަތީޖާތައް އާންމުކޮށް ޚިއްސާކުރެވޭނެ އެވެ. މިއީ ރާއްޖޭގެ މާލީ ދާއިރާގެ މުސްތަޤުބަލަށް އައު އުންމީދުތަކެއް ގެނެސްދޭ ވަރަށް މުހިންމު އެއްބަސްވުމެކެވެ.
